நிறப்பிரிகை

பனி படர்ந்த இக்காலைவேளையில்
ஊருக்கு வெளியே

நெடுஞ்சாலையில் நடப்பது

இதமாய் இருக்கிறது.
ஆத்ம சிநேகிதனைப் போல்

கூட வரும் காற்று
சாலையில் இருமருங்கிலுமுள்ள

கொன்றை மரங்களை அசைக்கையில்

இருந்த ஒன்றிரண்டு பூக்களும் உதிர்கின்றன.
ஒரு பூவைக் கையிலெடுக்கையில்
அது பூவாய் இல்லை

நிறமாய் இருக்கிறது.
மஞ்சள் காவி வெளிர் மஞ்சள்
நிறமற்றுப் போனபோது வெண்மை.
கடைசி முத்தத்தின் போது உதிர்ந்த மல்லி
என் ஆய்வுக்குறிப்பேட்டினுள்

காவியை எட்டியிருக்கிறது
இருத்தலின் நிறம் கருமை

பிரிவின் நிறம் காவி.